Paribasa Banjar: “KAYA TUPAI MANGGUGUT NANGKA”

Urang Banjar sama haja kaya urang banua lain: katuju bagaya, ba’ajakan, balalucu, mahalabiu. “Kaya tupai manggugut nangka”, paribasa Banjar gasan pasangan laki-bini nang kada sapala: awak nang laki (tupainya) halus, nang bini (nangkanya) ganal. 

Takisah, Utuh Tipang wan bininya Aluh Kaciput. Bulan Syawal, di banua Banjar, Kalimantan Selatan, musim urang bakawinan, bapangantinan. Imbah saruan di hilir kampung, rahat handak bulik Aluh Kaciput wan Utuh Tipang disambang urang.

“Ai, Aluh Kaciput! Lawasnya kita kada badapat!” ujar binian nang manyambang, nang patuknya mahabang sinang; baju bagirap-girap; giwang, kangkalung wan galangnya ganal -- alahan pada rantai jukung. 

“Ayuha pian bulik badahulu,” ujar Aluh Kaciput lawan Utuh Tipang wan anaknya. “Bawa kakanakan. Ulun badudi. Suruh Nining Antin mamutiki tapasan. Hari muru!”

“Maaplah, ulun mainjam bini pian satumat, handak bakisahan!” ujar binian nang habang patuk tu lawan Utuh Tipang. “Matan kakanakan ulun rakat lawan bini pian, sarantang saruntung, samuak saliur, alahan pada dingsanak!”

Amun bibinian batamu kawannya, sama kaya badapat gampiran: paraya dihadangi. Utuh Tipang mandusur bulik ka rumah lawan anaknya, Aluh Kaciput dihirit kawannya nang habang patuk tu ka warung, di subarang rumah nang bakawinan.

“Pinda mambuang parangai ikam nih, Aluh Kidas ai!” ujar Aluh Kaciput garigitan. “Napa garang nang handak dipandirakan? Jaka ka rumah!”

“Kada! Satumat haja!” ujar Aluh Kidas. “Lakiku mahadangi di mutur! Kami handak langsung labuh ka Banjar! Aku handak batakun banar ai. Di mana kawan kita Aluh Gabau taulih laki, maka inya wan lakinya kaya tupai manggugut nangka?” (ysas) 

(“Pandiran Banua”, TVRI Kalimantan Selatan, Banjarmasin. Siaran Saptu, 23.07.2016, Pukul 17.00 WITA.) 

Oleh  : Y.S. Agus Suseno, Banjamasin