BACUCUPATIAN - BACACAPATIAN - BATATANGGUHAN

Indoborneonatural----Kabiasaan wan adat budaya Banjar liwar banyaknya, tagal banyak nang sudah langlam -- atawa parak langlam -- tamasuk “bacucupatian” (“bacacapatian”), atawa “batatangguhan”.

Rahat bakawanan, sambil barucau, baramian wan bagayaan (pariannya, sambil mahadang buka puasa), bahanu urang Banjar, Kalimantan Selatan, “bacucupatian". “Bacucupatian”, atawa “batatangguhan”, saku ”basa laut”-nya “main teka-teki”, “main tebak-tebakan”.

“Bacucupatian” kada sahibar gasan balalucu -- kurang-labih kaya mahalabiu -- tagal maulah urang bapikir.

Pariannya:

“Sambil mahadang dauh babuka, kita bacucupatian, yu?” jar Utuh Tipang lawan bubuhannya nang lamah-liut, dudukan di ambin rumah Utuh Maklar.

“Ayuha. Napa cucupatiannya?” jar Pambakal Utuh Jagau.

“Sapuluh sinti, dikali lima sinti, dibagi ampat, sama dangan barapa?” jar Utuh Tipang.

“Pakai kalkulatur, bulihlah?” jar Utuh Maklar.

“Bulih!” jar Utuh Tipang.

Imbah mamicik-micik kalkulatur, Utuh Maklar manjawap : “Dua blas satangah sinti parsagi!”

“Salah!” jar Utuh Tipang.

“Hau...? Imbah pang, barapa?” jar Pambakal Utuh Jagau.

“Ampat kali sulum!”

“Hau? Napa maka kaitu?” jar Utuh Maklar.

“Jawapannya: wadai amparan tatak ulahan Aluh Kaciput!” jar Utuh Tipang.

Sabuting pulang, nah:

“Ayu tangguhi: apa bidanya bibinian wan sapida?” jar Utuh Supir lawan Utuh Tipang.

“Sutil banar!” jar Utuh Tipang. “Sapida dikumpa dahulu, hanyar dinaiki. Bibinian dinaiki dahulu, hanyar dikumpa!”

Di banua Banjar ada “Doktor Palui”, ada “Doktor Pamali”. “Doktor Palui” galaran gasan Doktor Zulkifli Musaba (nang S-3-nya maungkai “Kisah si Palui”), “Doktor Pamali” galaran gasan Doktor Hatmiati Masy'ud (nang S-3-nya maungkai “Pamali Banjar”).

Tamu kita hari ini Prof. Drs. H. Rustam Effendi, M.Pd., Ph.D, “Doktor Cucupatian” lulusan Universiti Utara Malaysia (UUM). Sidin “ahli cucupatian” -- sudah lawas ma’ajar di Fakultas Keguruan dan Ilmu Pendidikan (FKIP), Universitas Lambung Mangkurat (ULM), Banjarmasin. Napa ujar sidin? Kita itihi wan dangari sama-sama... (ysas).

Sumber : Face Book Y.S. Agus Suseno

CERPEN KISAH BAHASA BANJAR - KADA MAHARANI TIMPA

Cerpen Bahasa Banjar - Kada Maharani Timpa
Karya: Abdul Hanafi

Rajin subuh sudah mandi, babaju, basalawar. Hari ini masih batapihan duduk di kursi kayu nang baandak di ambin sambil... biasa...baruku.
Malarak luang hidung Adul manarik hinak mangulih ka balakang tacium bau kopi nang dibawa Umanya Si Uncal, bininya.
“Kada ka tarminal kah Abahmu hari ini ?” jar Umanya Uncal sambil manyurung cangkir halus baisi kopi panas.
“Parai... Umu ah !” Adul Manyahut sambil mahambus kukus ruku di muntung.
Limbah maandak di atas mija pipiringan baisi pais waluh tukaran di warung Acil Galuh subuh tadi, bini Adul badiri di higa.
“Napa kisah maka umpat bubuhan pagawai negri, libur jua Sabtu”.
“ Panumpang sunyi wayah ini, urang hakun basapida motor ka Banjar, jalan banyak nang rakai. Mana jua buhan taksi Banjar kawa dihitung wan kantut nang mau baantri di tarminal. Balirit mutur buhannya basusun di tikungan subalah pada kantor de pe er, incaan handak balarut”.
Dalam hati Manya Uncal pacang karing padaringan mun abahnya ‘Mogok Kerja’ kada mamaklar hari ini.
“Tapi kada nangitu pang pungkalanya aku kada turun hari ini”.
“Kanapa ?”jar nang bini maitihi.
“Itu... malihatkah rumput di halaman, parak hinggan lintuhut di banturan, musiah ada tadung mura balingkar ari malam kada kalihatan.”
“Jaka bakamarian haja pang basiang Abahmu atau disamprut lawan rundap?”usul Manya Uncal
“Aku handak baulahraga pagi...daripada katupuk-katupuk bukah, sama ha pada kaluar paluh”.
Bujur jua dalam hati Manya Uncal sakali samustawa baulahraga, kaluku mau jua awak badaging kada kurus manguringkai.
Hanyar dua talu ilaian Adul Kulidak mancangkul, ada sudah nang marawa malihat Adul bagawi kada singbajuan basalawar handap.
“Ui, ada sasah kuyuk... malihat tulang !”
“Kurdion malarak !” ajar saikung pulang malihat tulang tangkar adul. Adul kada kawa sarik dasar gawiannya jua rancak bapakalah urang.
Pahadangan Adul duduk istirahat ada nang gagadimpa datang tagas kaya pincang batis padahal dikilar mulai jauh tadi waras haja jalan. Pinda mambari maras muha. Limbah maucap salam basurung talapak tangan...
“Suka rela Pa”
Minta-minta sakalinya. ‘Pagalangan ganal. Jaka kada kaya incaan bapanyakit kusurungi cangkul. Potongan kaya ini bila dibari sama lawan maracuni, batambah kulir...’ dalam hati Adul
“Lalui !” jar Adul singka.
Kada sawat sapurung ruku ada pulang nang datang babaju cuklat bakupiah putih tas hirang basulimpang di bahu. Mun dilihat puling kada urang banua.
“Maaf mengganggu Pa Aji”
Dasar bujur manggangu pang dalam hati Adul, tapi tasambat Pak Haji maancap manyahut;
“Aamiin...mudahan bujuran naik haji kaina. Tanganku rigat, nangapa tu dibawa maka bamaf sagala?”
Baya dibuka maf, kartas bagambar sungkul masigit. Sumbangan Masjid nang dimana arih jauhnya pada banua saurang, sabak tandatangan wan stempel panitia. Bujur juakah ngini dalam hati Adul, lawas Adul mamikirakan taputar bigi mata kaya panari Bali, kilar sana kilar sini. Kasimpulannya..
“Sudah tadi, nang kaya kaini” jar Adul.
Pada mangunyur ha balalu sambil mailai tali tas salimpang malimpai ka balakang.
Balum simput burit lalakian nang maminta sumbangan tadi, ada pulang nang datang, sakalini bibinian bajujung susunan buku di kapala, kada bapipingkutan. ‘Ngini tapatut jua. Bajualan, tapi kada jauh pada duit ha jua’, dalam hati Adul.
Libah maucap salam, mamindah susunan buku ka pagalangan tangan kiwa, manampaikan buku kumpulan doa mustajab, kitab mujarabat, buku obat-obatan herbal, terapi pijat refleksi, ersp masakan, sampai photocopy nang balambaran doa harian, wafak, sasangga rumah, tulak bala, ayat kursi, nangapa apakah lagi nang gambarnya bapupulilit basulait batulisan huruf arab. Sabuting-buting kadada nang ditukari Adul, alasan;
“ Sudah ada baisi” jar Adul. Padahal mana ada.
Balalu jua bibinian nang bajaja buku sambil mangaluyu mangulih-ngulih ka balang kaluku Adul mangiau baasa. Kada harapan.
“Talu sudah Umu ah nang datang handak duit pahadangan kita marumput” jar Adul.
“Jangankan batalu, sapuluh gin nang datang kada masalah amun jawaban pian kaya kaitu ha, kada pacangan maharani timpa” jar Manya Uncal nang mulai tadi kakayu’ut mamapai tanah di akar
rumput cangkulan.

* * *

Cerpen :
Judul : Kada Mahari Timpa
Karya : Abdul Hanafi
Ilustrasi/Gambar : Abdul Hanafi
Tahun Rilis 2017.