Home » , , , » PELAMUTAN TERAKHIR DI BANUA BANJAR; GUSTI JAMHAR AKBAR

PELAMUTAN TERAKHIR DI BANUA BANJAR; GUSTI JAMHAR AKBAR


Itihi Gusti Jamhar Akbar -- "Palamutan Pahabisan di Banua"

Tahun ini umur banua Kalimantan Selatan 67 tahun, Indonesia 72 tahun. Jaman sasain maju, tagal lamut, seni tradisi Banjar, sasain langlam di Bumi Antasari. Palamutan nang ada sasain tuha, nang anum -- nang pacang manggantiakan -- kadada buriniknya. Amun nang tuhanya kadada lagi, saku lamut pacangan mati. Kadada nang bisanya lagi balamut.

Nasip wayang kulit Banjar wan madihin saku tabaik pada lamut. Ada haja dadalang anum nang bisa bawayang. Di Kampung Panggung, Barikin, Hulu Sungai Tengah, pariannya, ada Ufik Dalang, nang mawaris ilmu dadalang matan Abahnya, aruah Dalang Saderi.

Madihin baik lagi nasipnya. Banyak haja nang harat bamadihin, kaya John Tralala, Anang Syahrani wan Suanang Iyan. Nang taanum, ada jua, bujur balum mahir banar.

Tamu kita hari ini Gusti Jamhar Akbar -- dikiau “Ayah”. Saku sidin palamutan nang pahabisan di banua. Tumatan halus sidin sudah balamut, mairingi kawitan nang palamutan. Tahun ini umur sidin 75 tahun.


Di Banjar, rumah sidin takapit dalam Gang Mujahid Aman, Alalak Selatan. Mustinya ada urang sugih -- atawa Pamarintah Kalimantan Selatan -- nang mahadiahi rumah sagan sidin, kaya Hubnur Rudy Ariffin Bakhrun mahadiahi rumah sagan Anang Ardiansyah. Salajur mahadang disaru urang balamut -- lamut hajat atawa hiburan -- sidin bajualan pancarikinan di ambin rumah.

Syukur alhamdulillah, di FKIP ULM sudah ada “Doktor Lamut”, Sainul Hermawan, nang disertasinya -- “Ayangilah”: Resistensi Dalam Tradisi Lisan Balamut, Varian Gusti Jamhar Akbar di Banjarmasin, Kalimantan Selatan” -- 3 Juli 2017 maju sidang di Fakultas Ilmu Budaya, Universitas Indonesia; 23 Agustus 2017 samalam wisuda.

Tahun 2015 lamut diakui Pamarintah RI jadi Warisan Budaya Takbenda, tagal dimapa nasipnya kaina? Kita itihi wan dangari sama-sama, napa ujar “Datu Lamut” Gusti Jamhar Akbar... 

Tulilsan Y.S Agus Soeseno 

di #Pandiran_Budaya, Tvri Kalsel, Selasa, 19 September 2017, Pukul 17.30-18.00 WITA, live streaming www.tvri.co.id.


Sumber: Facebook Y.S Agus Soeseno !

0 komentar:

Kotak Pencarian


Powered by Blogger.